AAAH SAH, ole time people sey de longest liver will see de mose.
Miss Lady sey she kean even remember how long she live an she never know she wudda live fe see Jamaica change in a matter of seconds right before hear eyes.
She sey as long as she live again she will never forget which part she was on Saturday, February 25, 2006.
As you know arreddi, up into har likkle piece of bush she doan have no electricity so when something a gwaan pan teevee dat she want to see she haffe find herself into a yard wid both teevee an electricity.
Dat suppose to be a very shocking ting in 2006. But maybe somewhere somebody wid greater wisdom dan she a try proteck har from electric shack an some a de shocking tign s dem pan teevee so dem kean fine a way fe bring de wire dem come.
SMADDY WIT
BIG SCREEN TEEVEE
But never mind, she name hooman an she nuh siddung lament what's not she know how to meck what is to be, so she find herself into de yard of a smaddy wit big screen teevee.
She sey aldaogh it was Saturday it was har personal Ash Wednesday for she didn't talk to a soul an nobaddi cudda get har fe eat wan scraps a nutten.
An den de big irony, she nuh badda watch no local channel for she nuh undastand wha de whole heap an commentary a analyse bout.
Den she sey de smaddy fe de house bring wan radio come gi har an sey she fe lissen to dat den far a 'bare hooman song dem a play'. An de smaddy start a piece a dance an celebrate fram way up into de four o'clock inna de evening deh.
Meantime, she naw talk to a soul. She jus deh-deh a feel like de slave dem outa de bridge a Manchioneal inna Portland, a memba when dem did fool dem wid a likkle something name Apprenticeship when dem was looking for a big something name Emancipation.
Dat did cause dem fe languish inna a veritable purgatory a wait fe prove sey dem was smaddy an dem capable of manage dem owna destiny. Till when dem come back now bout Emancipation soon come again de people dem place demself into a position fe ansa back if dem did ever fool dem again.
Miss Lady, sey she travel back inna history an place herself right dehso pan de bridge and contemplate some quality contemplation, but like Bible Mary she a kip it inna har chest.
Den de smaddy fede teevee come tell har sey de Owna fe Yaad a go chat now. She look pan har watch and she switch de channel den she look pan de Owna a count off him finga, den him start talk, she look pan har watch again: 6:27 p.m.
She hear sinting bout alphabetically. Dat was a wrong word, for Miss Lady sey by dat time all betting did fe stop.
De smaddy fe de teevee get pen and paper. She naw get nutten for a nuh fe har job fe calculate at dat stage, plus har maths nat so good.
She sey before de Owna fe Yard cudda call out de tird alphabet, de smaddy fe de teevee start wan piece a Emancipation Brukins chu de house an ready fe go a street like she never hear sey de Owna fe de Yard did cancel de motorcade.
An chu de noise what de teevee smaddy was mekking Miss Lady never hear fe certain what de Owna fe de Yard sey.
De smaddy fe de teevee start repeat numbers. Hear Miss Lady "Me nuh waan fe hear nuh numba. Tell me what else him sey".
Hear de smaddy fe de teevee: "Me sey a bare hooman song a play pan de radio, come we go a street".
Miss Lady sey right dehso she come affa de bridge an she go lie dung, meck it soak in. 6:29 p.m.
Den she start feel light, like a market bankra come affa har head an she can move har neck freely roun now an look pan all what she cudden see before, vistas of possibilities.
De nex day she go back to where she daon have no electricity, but de people dem was Light. All de man dem a come greet har like sey is she personally go write exam and get de top grade.
Man what never see har from Adam inna plaza a shake har hand an sey, "We love whey unnu duh" an she a sey "Me nat even a delegate". But she well an know sey is nat dat him mean.
Him mean sey him see what happen inna Jamrock from we join de world in celebrating International Women's Day 1978 till now.
Him see what hooman a reason chu de connections between fe dem rights and human rights mean. Him see de benefits of all who did up an dung a go Mexico, Beijing, Egypt, Kenya an all bout a cipher out what two decades for women cudda mean fe we practically. An him see de whole world a come to dat understanding bout we an dem at de same time.
NEVER GO BACK
TO 'UNKNOWING'
Miss Lady sey she see sey between dat minute an de nex wan pan dat Saturday, Jamaica can never go back to a place of 'unknowing'. De whole a we see what determination an hard work can do.
She sey even Ananse feel like we learn what him trying all dis while fe teach we, no challenge no too big dat de likklest smaddy kean rise fe conquer it.
As a matter of fack, Miss Lady sey Ananse tell har sey, nat even we language can remain de same, for everytime we meck fe talk bad bout 'likkle people' now we haffe confront de fack sey wan a dem is we leader.
An all who love talk bout a woman's place is in de house, gwine haffe realise sey is right in deh she deh now an it spell wid a capital letter, she a de head a it.
An all who tink sey all hooman can do a go inna kitchen, Miss Lady challenge dem fe build a house widout a kitchen an see how dem manage.
Welcome to the 21st century. It more enjoyable if yu come willingly dan if yu come kicking and screaming.
On March 8, 2006 teck a different look at yu madda, yu daughter, yu isiter, yu wife, yu girlfrend, de teacha who afta 40 years kean buy har owna house but still inna de classroom a turn out lawyer, docta an Indian Chief.
Teck a good look at de lady who keep your house clean an keep yu children in order so you can do what you tink hooman kean do or nat suppose to do.
Teck a good look at yuself and shock yuself with how different it will be to say 'Happy International Women's Day'.
